Бүтэн сайн өдөр яг ний нуугүй хэлэхэд жаахан онцгүй эхэллээ. Заримдаа нэг тийм нийтдээ тэнэг өдөр байдаг даа. Яг л тийм өдрүүдийн нэг мэт санагдаж байлаа. Их ажлын үеэр зохицуулаагүй олон ажлууд байсаар байтал зарим нэг гарууд утсаа салгаад алга болж нервтүүлдэг байх нь байшд. Нээрээ энэ зарим хүмүүс ажил хийнэ гэж айл гэр болж тоглож байгаа юм шиг хөгийн царайлах юмаа.

Өглөөнөөс эхлээд урд кампруу явах нэг нөхөр утасдаад салахгүй байсан тул унаагаа тэр нөхөрийг хүргэж өг гэж хэлчихээд өөрөө хойд кампруугаа зуслангийн автобусанд суугаад явчихлаа. Тэнд хийх ёстой байсан лекц тун ч аятайхан боллоо. Миний ажил ердөө л тэр байсан юм. Тэгээд мөн л автобусандаа суугаад ажил дээрээ ирж жаахан бичиг цаас цэгцлэв.

Олон хоногийн борооны дараа гайгүй аятайхан өдөр болж байгаа тул жаахан алхах санаатай ажлаасаа гараад хөгжим бүжгийн урд талаар алхаж явлаа. Тэгсэн яг явган хүний зам дээр цагаан цамц зангиа болсон хоёр гадаад нөхөр хажуугаараа өнгөрч байгаа хүн болгоныг зогсоогоод л ямар нэг юм тайлбарлаад байгаа харагдав. Миний бие энэ нөхдийн их эртнээс мэднэ л дээ. Есүс Христийн хожмын үеийн гэгээнтнүүдийн сүм буюу Мормоны урсгалын төлөөлөл болох Элдрүүд мөн гэдгийг хаа холоос хараад л мэдэж байлаа. Тэд дандаа л цагаан цамц хар зангиа болоод хоёр хоёроороо гудамжаар явж байдаг тул та нар ч мэдэх байх.

Анх 1995 онд байхаа Найрамдал зусланд багшилж байхад анхны элдрүүдийн нэгэнтэй хамтран ажиллаж байсан юм. Манай нөгөө бүлгийн багш маань бас нэгэнтэй нь хамтран ажиллаж байгаад одоо Элдрүүдийн нэг сүмд ажиллаж байгаа. Мөн олон ч найз нар маань энэ урсгалтай холбоотой байдаг тул би эдний талаар сайн мэддэг билээ.

Ер нь ч тэгээд миний хувьд шашинтай холбоотой асуудалд нэг их оролцдоггүй. Хүний оюун санааны үнэт зүйлсрүү нь довтлохыг хорвоогийн хамгийн бүдүүлэг зүйлсийн нэг гэж үздэг тул шашны холбоотой маргаан үүсэх бүрд аль болох зайлсхийж явдаг нэгэн билээ.

Гэхдээ л энэ мэт гудамжинд явж байгаа хүмүүсийг хоргоон өөрийн шашнаа сурталчлах, автобус, хүүхдийн тоглоомын талбай, олон нийтийн бусад газар тэр ч байтугай гэрт орж ирж өөрийн шашнаа сурталчилдаг асуудалд үнэхээр дургүй нэгэн билээ.

Би ч өнөө хоёр дээр яваад очлоо. Урдаас бас хазгайдуухан Монголоор "Та сайхан зусч байна уу? Таньд хэдэн зүйл танилцуулах гэсэн юм" гэж байна. Би та Англиар ярьчихаа гэж байгаад "Энэ асуудал Монгол улсын хуулийг зөрчиж байгаа хэрэг шүү. Танд гудамжинд шашин сурталчилах эрх байхгүй" гэлээ. Тэгсэн би шашин сурталчилаагүй "сайн мэдээ түгээж байна" гэнээ. Би ч хариуд нь "Энийг сурталчилгаа л гэдэг юм даа. Хэрэв та үгүй гэж бодож байгаа бол би цагдаа дуудаж таньд хуулийг нь үзүүлэх үү? " гэтэл өнөө хоёр чинь "No nо. Ok maybe you meet me later our church" гэх маягийн юм яриад хурдхан замаа буруулан явж одлоо.

Та нар энэ асуудлыг юу гэж бодож байна вэ? Өмнө нь би Асуулт самбарын Шашин гэдэг сэдэв дээр хүүхдүүдэд асран халамжлагчийх нь зөвшөөрөлгүйгээр шашиндаа оруулах сурталчилгаа хийж байгаа нь буруу гэсэн талаар ярилцсан юм.

Тэгэхэд нэг хүн "манай гэрийн хажууханд Амээн гээд цуглаан орчихсон байна. Тэгээд гадаа салхилж явахдаа ажиглаж байхад дандаа 13-с доош насны хүүхдүүдийг цуглуулаад хаалгаа цоожилж байгаа харагдах юм. хэсэг байж байгаа нөгөө хүүхдүүд нь нэг нэг модон чихэр барьчихсан гараад ирэх юм. Гаргахдаа дотроос нь нэг туранхай 16-18 насны орчим банди хаалгыг нь онгойлгоод гаргахдаа хэнээ чи маргааш найз нарыг ээ дагуулж ирнэ шүү гэж хэлж байх юм. 4 хүүхэд дагуулаад ирээрэй гэхэд нь шал дургүй хүрэв. /Хэн бэ яагаад хүүхдийн эрхэнд бүдүүлгээр халдаад байгаа юм бэ/
Гарч ирээд л буцаад л нөгөө тоглоомын талбай дээрээ хөөцөлдөх нь хөөцөлдөөд л гулгах нь гулгаад л тоглоно. Гарч ирсэн хүүхдээс нь би ингэж асуулаа. Чи сая цуглаанаас гарч ирэв үү гэхэд тийм ээ гэж байна. Тэгээд юу ярьж байна үнэн юм ярьж байна уу гэхэд "үнэн" гэж хэллээ. Чи яаж мэдэж байгаа юм бэ гэхэд мэдэхгүй гэж хариуллаа. Эндээс би нэг зүйлийг бодлоо л доо.
Тэр хүүхдүүд зүгээр тоглоомын талбай дээрээ тоглож болдоггүй юм уу. Мэдэхгүй үнэн гэдэг зүйлийг албан хүчээр сурах, хүүхдийн гэнэн томоогүй занг ашиглаж өөрсдийн зорилгодоо нийцүүлж байгаад эгдүүцэж байлаа.
Хэрвээ манай хүүхдийг гадаа тоглож байхад нь ингэж авч яваад хүчээр ийм зүйл хийх юм бол би шууд цагдаагийн байгууллагад хүүхдийн эрхэнд халдсан гэж гомдол мэдүүлнэ ээ. Эсвэл өөрөө орж хэрүүл хийнэ. " гэсэн байлаа. Энэ бол манай Улаанбаатар хотод ч бус хөдөө орон нутагт ч элбэг тохиолдож байгаа үзэгдэл билээ.

Үүнийг би лав буруу гэж бодож байна. Та бүхэн юу гэж бодож байдгаа доор сийрүүлэн бичээрэй. Монгол улсын засгийн газарын дэргэд Шашин, сүм хийдийг зохицуулах хороо гэж байдаг л байхдаа тэр нөхөд юу хийдэг юм бол?

Сонирхуулах үүднээс хуультай нь танилцахад ийм заалтууд байх ажээ.

ТӨР, СҮМ ХИЙДИЙН ХАРИЛЦААНЫ ТУХАЙ

3.7.З. Шашны зан үйлийг тухайн шашны уламжлалт ёс журмын дагуу энэ хууль, бусад хууль тогтоомжоор тусгайлан хориглоогүй газарт сүсэгтний хүсэлтээр тэдэнд зориулж чөлөөтэй үйлдэж болно.

3.7. 7. Аливаа шашны байгууллага, лам санваартан өөрийн шашныг эс шүтэгчдэд үзэл номлолоо хүчээр тулгах, шахалт үзүүлэх, эд мөнгөөр татах, хууран мэхлэх, тэдний эрүүл мэнд, ёс суртахуунд хохирол учруулах, санаа сэтгэлийг үймүүлэхийг хориглоно.

4.13. З. Энэ хуулийн З дугаар зүйлийн 2,З дах хэсэг, 4 дүгээр зүйлийн 6,7 дахь хэсэг, 7 дугаар зүйлийн 5,6,7 дахь хэсэг, 8 дугаар зүйлийн 2 дахь хэсэгт заасныг зөрчсөн нь эрүүгийн хариуцлага хүлээлгэхээргүй бол шүүх иргэн, лам санваартныг 10000-3000, албан тушаалтныг 15000-40000, шашны байгууллага, сүм хийдийг 50000-200000 төгрөгөөр торгох шийтгэл ногдуулна.

Би хүсвэл өөрөө шашнаа сонгоод шүтэж чадна.

Хэн нэг нь намайг хаа нэгтэй зүгээр явуулахгүй шашин сурталчилаад байхыг зөвшөөрмөөргүй байна.