Өнөөдөр бид маш олон зүйлд санаа зовон амьдарч байгаа. Тэр бүхнийг тоочих ч боломжгүй юм уу даа. Магадгүй эдний дотроос хамгийн бага санаа зовж байгаа зүйлсийн жагсаалт гаргавал УС байж ч магадгүй юм. Хамгийн хямдхан, хамгийн элбэг юм ус л байна. Эртнээс "чандмань" эрдэнэ хэмээн дээдлэж ирсэн боловч өнөөдөр бол зүгээр л "устгаж" хэрэглэж байна шүү дээ. Чандмань эрдэнэ гэж зүгээр ч нэг нэрлэсэн юм биш H2O гэсэн химийн томъёо нь өөрөө чандманласан гурвал хэлбэртэй гэж тайлбарлаж байхыг ч сонсож л байсан. Карантнаас, жорлонгийн почкиноос, худгаас гоожиж л байдаг, хажуугаар гол дүүрэн урсаж, тэнгэрээс бороо цас болон орж, нуур далай болон мэлтийж байдаг энэ ус гээчид "санаа зовох хэрэггүй" мэт л харагдаж байгаа байх даа. 

Гэтэл үгүй юмаа. Магадгүй бид мөнгөгүй бол түүнийг хүч хөдөлмөрөөрөө дахин бүтээж болох, мөн алтгүй бол өөр нэгнээр орлуулж болох, газрын баялаг дуусвал мөн л шинэ зүйлийг бүтээж чадах. Гэтэл усгүй бол бид яах билээ дээ.

Та бүхэн интернэтээс усны тухай олон төрлийн, маш сонирхолтой бас бодууштай сурталчилгаануудыг үзэж, харж, бусаддаа ярьж, халаглаж байсан л байх. Тэглээ гээд та яг ямар алхам хийсэн бэ? Усаа хэмнэхийн тулд. Нэг удаа ч болов бодоод үзээрэй. Магадгүй та юуг ч өөрчлөөгүй бол одоо миний доор өгүүлэх хэсэгхэн бичвэрийг минь тун анхааралтай уншаад өөртөө болвол гэр бүлийхэндээ, найз нартаа, үр хүүхдүүддээ, ажлын байрандаа мөрдлөгө болгохыг хичээгээрэй. Бид ядаж үүнийг хийчихвэл цэнхэр дэлхий минь арай удаан орших болов уу хэмээн найдна. 

Та өдөрт шүдээ хэдэн удаа угаадаг вэ? За дунджаар 2 удаа гэж тооцоё. Хүний нэг удаа шүдээ угаах хугацаа 3 минут. 1 минутанд крантаар 5л ус гоождог. Та нэг удаа шүдээ угаахдаа л 15л ус гоожуулдаг байх нь. Өдөрт 30 л ус зүгээр л шүдээ угаахын тулд гоожуулдаг байхнээ. Сард бол 900 л буюу бараг л нэг тонн ус. Жилд 12 тонн усыг та шүд угаахдаа зарцуулж байна. Тоолуургүй, үнэгүй юм чинь асгарч л байг гэж орхимооргүй байна. Гэр хорооллын 4 ам бүлтэй нэг айлын өдрийн УНДНЫ УС бараг л 30 л байх шүү. Та нэг айлын бүтэн өдрийн цай, хоолны усаар зөвхөн шүдээ угааж байна шүү.

Үүнийгээ өөрчлөөд шүдээ угаахдаа шилэн аяганд усаа хийж аваад л хэрэглэчих. Маш их хэмнэлтээс гадна ирээдүйдээ маш том хөрөнгө оруулалт хийж байгаа хэрэг юм.

Бас нэг анхаарах зүйл байна. Би бол энэнд асар эмзгэлдэг хүн. Заримдаа ч айлын жорлон ухаад зогсоно шүү дээ. Хэрэв танай гэрт, танай албан байгууллагад, таны ойр байгаа нийтийн эзэмшлийн устай холбоотой цэгт байрлаж байгаа крант, почки болон бусад газраас ус хаагдахгүйгээр маш багаар ч болов гоожиж байгаа бол та л үүнд санаа зовоод засчих. Өөрөө засч чаддаггүй бол мэддэг чаддаг хүнд нь хөлс мөнгийг нь төлөөд засуулчих. Танаас, танай байгууллагаас маш бага мөнгө гарах боловч та энэ үйлдлийг хийснээрээ асар их цэвэр усыг хэмнэх юм шүү.

Мөн та машинаа шүршиж угаадаг газар биш саванд хийсэн усаар угаадаг газарыг сонгож угаалгахыг хичээгээрэй. Таны машинд зарцуулах усаар хэдэн ч хүн усанд орж амжихаар санагддаг шүү.

Мэдээж техникийн дэвшлийг ашиглах нь зөв боловч зарим нөхцөлд бас бид нар эх дэлхийдээ ээлтэй технологийг сонгох нь ч зөв байж болохыг өнөөдрөөс л ухаармаар байна.

Бид бүтээж чадахгүй бол энэ мэтээр хэмнэж чадая л даа. Бидний хэмнэсэн ус тэдэнд өв хөрөнгө болон очиг. Та хаана амьдардаг нь хамаагүй шү дээ. Нэг л дэлхий.

Бид ч юуны ялгаа

Зургийг эндээс авсан: http://www.hemmy.net/category/interesting-stuffs/page/7/

Энэ 7 хоногийг байгаль хамгааллын 7 хоног болгоноо.