Энэ 7 хоногийг би нэг зүйлд төвлөрүүлчихсэн байгаа шүү дээ. Яг тэр сэдвийн хүрээнд саяхан НҮБ-ын сайн дурынхны хөтөлбөрөөс нэг ийм танилцуулга, мэдээлэл ирсэн юм. Үүнийг та бүхэндээ хүргэж байна. Дараа нь бас нэг төслийн уралдааны зар оруулнаа. Байгаль дэлхийнхээ төлөө нэгдээд нэгдээд явчихна шүү андуудаа.

Нүүрстөрөгчийн мөр ба Уур амьсгалын өөрчлөлт

1. Нүүрстөрөгчийн мөр гэж юу?

Нүүрстөрөгчийн мөр гэдэг нь "хувь хүний хийж буй үйлдэл болон байгууллагын бараа бүтээгдэхүүн, үйл ажиллагаанаас болоод ялгарч буй хүлэмжийн хийн нийт хэмжээ" юм. Энэ нь дэлхийн дулааралд гол нөлөө үзүүлж буй хамгийн гол  хүлэмжийн хий болох нүүрсхүчлийн хийн хэмжээг илэрхийлнэ. Хүлэмжийн хийг бууруулах стратегийг хөгжүүлэхийн тулд хувь хүн, үндэстэн, байгууллагын нүүрстөрөгчийн мөрийг хэмжих хэрэгтэй юм.

2. Өөрийн Нүүрстөрөгчийн мөрөө хэмжиж үзэх үү?

Та өөрийн нүүрстөрөгчийн мөрөө хэмжиж үзмээр байна уу? Тэгвэл дараах вебсайт руу орж болно:

http://www.nature.org/initiatives/climatechange/calculator/
http://www.carbonfootprint.com/calculator.aspx

3. Уур амьсгалын өөрчлөлтын тухай баримтууд

• БАРИМТ 1: 20-р зуунд дэлхийн дундаж температур Цельсийн 0,7+0,8 градусаар нэмэгдсэн байна. Харин энэ чигээрээ байвал 21-р зуунд Цельсийн 2,1+6,4 градусаар нэмэгдэнэ.
• БАРИМТ 2: Америкийн Нэгдсэн Улсад дэлхийн хүн амын 5% оногддог боловч дэлхий дээр ялгарч буй нийт нүүрстөрөгчийн 22%-ийг дангаараа ялгаруулж байна.
  
• БАРИМТ 3: Нийт нүүрстөрөгчийн ялгаралтын 20-с 25 хувь нь зөвхөн ой модыг огтолж цэвэрлэх, газар ашиглалтыг өөрчилсөн үйлдлүүдээс үүсч байдаг.
• БАРИМТ 4: Алтан мэлхий (Bufo periglenes) нь Уур амьсгалын өөрчлөлтөөс болж мөхсөн гэж хэлж болох анхны биологийн төрөл зүйл болж байна. Цаашид энэ категорид ороход бэлэн 16,928 төрөл зүйл байгаа нь дэлхий дээрхи нийт амьтан ургамлын аймгийн 40% нь болж байна.  
• БАРИМТ 5: Бидний хэрэглэдэг цахилгаан хэрэгслүүд нь нүүрстөрөгчийг санаанд оромгүй ихээр ялгаруулж байдаг. Тухайлбал; бичил долгионы зуух жилд 39 кг CO2 ялгаруулж байдаг бол угаалгын машин 51кг, LCD TV 5 кг (тэгэхэд 34 инчийн плазма TV 269кг!), хөргөгч/хөлдөөгч 175 кг-ийг ялгаруулж байдаг байна.
• БАРИМТ 6: Уур амьсгалын өөрчлөлтөөс болж хар салхи, ган, зуд, үер, түймэр тохиолдох нь улам олширч, үүнээс үүдсэн гамшиг хохирол ихэсч байна.
• БАРИМТ 7: Уур амьсгалын өөрчлөлтөөс болж өвчин тараагч хортон шавьжны тоо нэмэгдэж байна. Мөн хүн амын дунд хурдан тархах халдварт өвчнүүд сүүлийн үед их гарах болсон нь Уур амьсгалын өөрчлөлттэй шууд холбоотой гэж эрдэмтэд үзжээ.

4. Тэгвэл бид юу хийж чадах вэ?

Маш их зүйл хийж чадна! Хүмүүс онгоцоор нисэх, машинаар явахаа багасгаж, ганц ч гэсэн мод ургамал ургуулж, машиныхаа дугуйг хийгээр дүүрэн байлгаж, бага юм хэвлэж хувилж, шүдээ угаахдаа усаа хааж, хүнгүй өрөөний чийдэнгээ унтрааж, импортын хүнсний бүтээгдэхүүнээс аль болох татгалзан үндэсний үйлдвэрлэлээ дэмжиж, мах бага идэж, цахилгаан бараа машин авахдаа анхааралтай хандахад л хангалттай. Энэ бол дэлхийн дулаарал болон уур амьсгалын өөрчлөлтийн эсрэг, хүлэмжийн хийг бууруулахад бидний хийж чадах хамгийн эхний бөгөөд энгийн алхам юм.

Бид асар ихийг өөрчилж чадна. Оройтсон л байх тэгэхдээ бүүр оройтчихоогүй байна.