Сүүлийн хэдэн сарын хугацаанд томилолт, ажил гэсээр байтал гэр орондоо амралтаа өнгөрүүлэхгүйгээр асар их удсан байна. Сүүлийн амралтын өдрүүдийг ямар ч элдэв юм бодохгүйгээр гэрийн дулаан сайхан уур амьсгал дор өнгөрүүллээ. 

Гадаа хүйтэн салхитай, хааяа хааяа цасаар шуурсан муухай жихүүн өдөр болж байгаа нь салхивчны завсараар сэр сэр үлээн улих чимээнээс мэдэгдэж байлаа. Гэвч гэртээ охин, хүү хоёроо эрхлүүлэн эхнэрийнхээ гарын хоолыг идээд унтах үедээ унтчихаад, ТВ үзсэх юмуу Лаптопоо балбасан шиг хэвтээ надад гаднах тэр хүйтэн уур амьсгал яахан нөлөөлөх билээ дээ. Үнэхээр сайхан амралт боллоо.

Нээрээ ойрд ингэж сайхан амарсангүй шүү. Тэгээд л бодоод байсан чинь миний хамгийн их аз жаргалтай байх орон зай минь энэ л 2 өрөө байр энэ л хайртай хүмүүс минь юм байна гэдгийг бүүр ч илүү мэдэрлээ.

Зүгээр ч нэг хэвтээд байсангүй гэр орноо цэвэрлэхэд тусаллаа. Сүүлийн үед дандаа эвдрээд амьтан хүн бухимдуулаад байсан 00-ийн асуудлыг эцэслэн засварлалаа. Хөдөөнөөс ирээд амьтан хүн гар хүрээгүй байсан томхон яснуудын учрыг олж эвдэж, салгалаа. Хураалттай байсан хувцаснуудыг угааж дуусгалаа. Хамгийн гол нь ойрын хугацаанд мартагдаад ховор, хуучин үгсийн жагсаалтанд ороод байсан “Би чамдаа хайртай шүү” гэдэг үгийг эхнэртээ харамгүй хэллээ.

Охин минь их л аз жаргалтайгаар намайг хаана л явна дагаад л үймүүлээд явах. Хэрэндээ л туслаад байх шиг байгаа юм. Даан ч бид хоёр тэр болгон "алхам" таарахгүй тул охин хааяа надад гомдоод хов мэдүүлээстэй. Бас хүү ч зүгээр байхгүй ямар нэг асуудлаар "донгодуулаастай". Хааяа тоглоно, хааяа үлгэр ярина, нэг бол манай хоёр надад үлгэр ярьж өгнө, тэгж байснаа л хэн нэг нь гомдох юмуу, уйлна, хов мэдүүлнэ. Хэ хэ. Эхнэрт энэ байдал нь маш их таалагддаг байхаа.

ТВ-ээр олон л сайхан кино үзлээ. Ойрд нээрээ ингэж стрэссээ тайлах арга хэмжээ аваагүй юм байна.

Эхнэрийн амралт эхлэчихсэн болохоор бид гуравт цаг зав гаргаад сайхан байна шүү. Нээрээ охин бид хоёр хагас сайнд эмээгийндээ очиж цагаан сарых нь буузнаас хийлцсэн юм байна. Манай дүүгийн охин гэж нэг муухай хүүхэд байдаг юм. Манай охин тэрийг миний дүү гээд л аймаар өөд нь татах санаатай байгаа юмаа. Гэтэл өнөөх жаахан нь тоохгүй бас ойлгохгүй инээгээд л байдаг. Охин жаахан учирлаж байснаа л Аав энэнд ингээд хэлээд өг гээд байдаг. Гэтэл би охиноос илүү тэр жааханд ойлгуулна ч гэж байхгүй л дээ. 

Хараад байхад ээж минь бас л их жаргалтай байгаа харагдсан. Хүүхдүүд нь цуглаад бужигналдаж байх нь сайхан байдаг бололтой.

За хөө амралтын өдрүүдийн тайлан шиг л боллоо. Тэгэхдээ гол нь залуучуудыгаа хааяа нэг ингэж гэр бүлийн халуун дулаан уур амьсгалд толгойгоо амрааж, гэр оронд байх өөрийн ритингийг нэмж байгаарай, хаана ч чиний гэр орон, гэр бүл шиг чинь гайхалтай сайхан аз жаргалтай газар байхгүй шүү л гэж хэлэх гэсэн юм.

Би зөвхөн гэртээ эхнэр, хүүхдүүдтэйгээ байхдаа л өөрийнхөөрөө байж хааяа бас хүүхдүүдийн хүсэлтээр морь, нохой, шувуу, онгоцны жолооч, цагдаа магадгүй огт байхгүй ямар нэг амьтан болон эрх чөлөөгөө мэдэрч байдаг шүү дээ.

Тиймээ хайртай эхнэр, охин, хүү гуравтайгаа хар гэртээ хаан болж суух шиг жаргал хаана билээ дээ.

Над шиг тэнүүлчин хүн ховор л байх л даа. Хэ хэ.