Нийт банжигчид болон уншигчид та бүхэн минь сайхан баярласан биздээ. Нар ээсэн зуны улиралд болдог, хүүхэд бүрийн хүсэн хүлээдэг баяр маань эцэг, эхчүүд бид байтугай өнөөх хүсэн хүлээсэн хүүхдүүд маань ч халширхаар баяр болсныг харамсан бичих гэж байна. Тэгэхдээ бас сайн дэвшилттэй талууд байгааг дурсахгүй байж болохгүй ээ.

Жишээлбэл хувийн компаниуд баярт анхаарлаа хандуулан үнэн сэтгэлээсээ хямдрал, бэлэгтэй худалдаа, үнэ төлбөргүй шоу зохион байгуулдаг болж. Хаа очиж энэ шоунууд нь харьцангуй эмх цэгцтэй, зохион байгуулалт сайтай болж байгаа нь баярлан бахдууштай юм. Гэхдээ зарим нэг нь өөрийнхөө гадаа талбайн хүчин чадлыг тооцоогүйгээс хэт олон хүн нэг дор шахалдан хүүхэд, хөгшид дарагдах аюултай байдал үүсэгсэн байсныг өгүүлэх хэрэгтэй байхаа.

Би бас л эцэг хүний хувьд хоёр хүүхдээ бүлтийтэл нь гоёоод л баяр үзүүлэх санаатай гараад өглөө. Гэрээс гарахад л нар шараад их л сайхан өдөр болж байгаа нь тодорхой байлаа. Хоёр хүүхэд маань өнөөдөр бидний баяр гэдгийг амьхандаа мэдсэн тул надтай зөвшилцөх бус тулган шаардах стилээр харьцаж байгаа нь яах аргагүй эрхээ мэдсэн хүмүүс гэдгийг нь харуулж байлаа.

Гэтэл хотын төврүү орохоос эхлээд л бухимдал үүсч эхэллээ. Зам баруун 4 замаас эхлээд нам түгжирлээ. Уг нь бас жанжны талбай оруул их аятайхан юм үзүүлчихнэ гэсэн тэмүүлэлтэй яваа юм л даа. Тэгээд өнөө хоёртоо алхах гоё, одоо энүүхэнд ойрхон гэж ухуулаад бас ч үгүй ундаа энэ тэр авч өгч хахуульдаад алхаж гарлаа. Зиа тэр замд байгаа олон хүн, хог энэ тэр бол аймаар байсаан. Хүн болгон л нэгээс хоёр час улайсан хацартай хүүхдүүдээ хөтөлсөн, тэвэрсэн, чирсэн байдалтай явах бөгөөд хэрэндэ л хүүхэддээ бухимдлаа харуулахгүйн тулд юухнаас ч баяр хөөр олж харах гэж энийг хараа, тэрийг хараа хэмээн явна.

Явсаар байгаад Сүхбаатарынхаа талбайд ирлээ. Гэтэл яг л Нарантуул зах нүүгээд ирчихсэн юм шиг өнгө төрх угтаж байна. Шалдар булдар, хэрэгтэй хэрэггүй хүүхдийн нүд хуурах гэсэн новшнууд дүүрэн. Бас хөдөлдөг, хөдөлдөггүй машин дээр суулгаж мөнгө олох гэсэн, төрөл бүрийн мөрийтэй тоглоомуудаар шулах гэсэн, үнэ нь ахадсан мөхөөлдөс, ус мусхан зарах гэсэн нөхөд л талбайгаар дүүрэн. Энд тэнд нь хэдэн том тайз байгаа боловч хоорондоо дуу нь нийлчихээд чухам алин дээр нь юу болж байгаа нь тийм ч сайн ойлгомжтой биш байлаа. Зиа нэг иймэрхүү дүр төрх байдаг даа гээд охиндоо ганц шаар авч өгчихөөд л талбайг баруун урдаас нь зүүн хойш нэвт хөндлөн алахдаг баатар болоод л зүтгэж гарлаа.

Яг бас хоёр хүүхэдтэйгээ жонхуурсан хүнд манай талбай ч мэнэнгийн тал шиг том эд байна шүү. Аан тэгж явахад харсан бас нэг зүйл бүүр ч нэг баяр биш бараан зах шиг харагдуулаад байсан. Уг нь нэг шаар, туузаар хүүхдийн баярыг чимдэг дээ. Тэгсэн энэ жил зүгээр хэлхчихсэн подоолкоор /богино ханцуйтай цамц/ чимчихсэн байсан. Тэр одоо хэвлэлийн цехийн эрхлаамаа энд ингэж амьтны толгой дээгүүр татах хэрэг байсан л юм байхдаа. Зохион байгуулагчид нь ч гэсэн ийм зөвшөөрөл өгч л байдаг. Хайн гэчихээд л явж өглөө. Тэгсэн яг сайхан хөшөө өнгөрөөд явж байсан чинь цагдаа агаа нар зам хаагаад зогсчихсон байна. Цаашаа чинь гарах гэсийн гэсэн чинь "Төрийн арга хэмжээтэй тойроод яв" гэж байна. Тэгсэн Хятадын том дарга ирж байгаа түүнийг яг талбай дээр л хүлээж авахгүй бол болохгүй гээд цагдаа нараараа хамгаалуулчихаж. 

Зиа зиа энүүхэнд соёлын төв өргөөний халга байна тэр л хүрчүүл гээд зүтгэсэн чинь замыг нь бас цагдаа хаачихсан байна. Хүүхэд чирээд зовж явна. Агаа нь цаашаа чинь гүйгээд гарчихая гэсэн чинь урдуур тойр гэнэ. Тэгээд л хараалаа дотроо хашигчаад л буцаад урагшаа явсан. Тэгсэн бүүр дуурийн театрын урдуур ганц гарцтай болгочихсон байна. Мөн ч зөв менежмент өндөр зохион байгуулалттай төрийн арга хэмжээ шүү.

Ингээд талбай дээр бараг л бичмэл Ш үсэг бичих маршрутаар явж байх хугацаанд хөл доорхи хог гэж зүгээр бүтэн жил хороог нь цэвэрлээгүй малын хашаа шиг л байна. Олны дунд хүүхдээ шээлгээд зогсож байгаа хөөрхий аавтай ч таарлаа. Тэр хүнийг буруутгахгүй байна. Аргагүйшд нойл болон хоолны газар, лавлах төв ч үгүй зохион байгуулагдаж байгаа ийм баярт харин ч хүүхдийнхээ "Би шээе" гэснийг дуулсан нь их юм. 

Зүтэгсээр ХАС банкны өмнө байрлаж байгаа ДҮДҮ-ийнхэн болон СКАУТ-ынхан дээр очтол тэр хавьд харьцангуй эмх замбараатай. Ядаж л арга хэмжээ бүр нь өөрийн гэсэн сүүдрэвчин дор явагдаж байлаа. Тэнд хоёр хүүхдээ амраангаа бас өсвөрийн сумочдын тэмцээн, Хакухо аваргыг харчихлаа. Болоо болоо.

Идэх юм нэхсэн хоёр хүүхдээ ижийг нь иртэл яах билээ гэж байсан намайг нэг айхтар бүдүүн улаан авгай 500-ийн хуушуур зарж явж амь аварлаа. Өөр үед бол "ална" гэсэн ч ийм юм авч идэхгүй боловч ойр хавьд "цэвэр" газар байхгүй, байгаа нь дүүрэнг мэдэж байгаа тул "сайхан хуушуур" байна гээд л хусч орхисон. Гэрээсээ хүнсээ бэлдэж гаралгүй "баяр зохион байгуулагчдад" итгэсэн өөртөө л гомдохоос. 

Зиа тэгээд бас л баахан түгжирлийн дундуур хичээсээр амьтны хүрээлэн гээчрүү нь очлоо. Тэгсэн зүгээр нунтаг улаан шороо түшсэн бас л нэг хар зах угтах бөгөөд "Билет дууссан" байх юм. Суудлаар суудаг кино театр бишдээ. сонин юм гэж бодоод жаахан дөхсөн тэр хамгаалагч энэ тэр нь уг нь цагаан цамц, хар пиджазтай л эхэлсэн байх гэж танигдахаас царай, цамц, пиджак, үс, царай тэр ч бүү хэл хавь ойрых нь хашаа, саравч үзэж яваа бид хүртэл галт уул дэлбэрээд үнсэн бороо орцон юм шиг сав саарал нөхөд болчихож байна.  Энэ тухай МЭНДЭЭ эмчийн БЛОГ дээрээс ЭНД ДАРААД үзчихээрэй. Амьтны хүрээлэн ийм байдаг ч үгүй байхаа. ХАйн.

Зиа зиа ерөнхийдөө ингэс гээд би ч тэр эхнэр ч тэр хоёр хүүхэд ч тэр залхав. Залхах юу байхав шантрав.

Ингэж баярлахын оронд салхинд гардаг байж. Уг нь байгаль суйтгэж байгаа хүмүүст нэмэр болоод юүкэв л гэж бодсон юм л даа.

Үүнээс харахад бидэнд өнөөх л хогийн сав, нийтийн бие засах газар гол нь нийтийн амралтын бүс амин чухал хэрэгтэй болсныг харж болж байна даа.

Хүүхдүүдтэйгээ баярласан баяр минь

Хөлс, шороо, хог, наймаагаар дүүрэн байв

Хөгжилтэй инээдтэй, өнгө өнгийн хувцастай жаалууд

Хэдхэн минутын дотор бүгд саарал өнгөтэй болов

Ийм л байлаа даа. Нээх сайхан амралт, чөлөөт цагийн цэцэрлэгт хүрээлэнтэй болох юмсан.

Нэг иймэрхүү...

Бас иймэрхүү л байлаа даа...

Энэ хоёр зургийг бас л МЭндээ эмчийнхээс авчихлаа.